Sei laburmetraik hartuko dute parte Zinemaldiko Eusko Label laburmetraien sarian, eta bi sariak emango dituzte, besteak beste, Frédéric Boyer Tribeca, Les Arcs eta Reykjavik jaialdietako zuzendari artistikoa buru duen eta Roberto Ruiz sukaldariak osatutako epaimahai batek.
Sei lan horiek Zinemaldiak eta HAZIk bultzatutako Eusko Label sailaren lehen ediziora aurkeztu diren 20 lanetatik aukeratu dira. Ekimenaren helburua da hurbileko produktua zinemaren bidez zabaltzea eta babestea, eta, horrez gain, nekazaritzaren, abeltzaintzaren eta arrantzaren munduan iraunkortasunarekin zerikusia duen oro sustatzea eta ezagutaraztea.
Lehiaketaren oinarrietan eskatzen zen bezala, aurkeztutako lan guztiak telefono mugikor batekin eginda daude eta ez dute hiru minutu baino gehiago irauten. Aurkeztutako laburmetraien artean, hurbileko produktuari, tokiko ekoizleei edo urak nekazaritzan eta abeltzaintzan duen garrantziari buruzko istorioak daude. Lehenengo saria 6.000 eurokoa izango da film labur onenarentzat, eta bigarrena 4.000 eurokoa. Sariak, berriz, irailaren 30ean, larunbatean, Kursaal Auditorioan egingo den itxiera galan banatuko dira.
Eusko Label sariak mezu positiboak zabaltzea sustatzen du, landa-inguruneak eta itsasertzak eta Euskadiko lehen sektoreak hiri-gizarteari egiten dioten ekarpenarekin lotuta. Azken batean, helburua da zinemaren bidez ezagutaraztea landa- eta itsasertz-ingurune bizi batek duen garrantzia, daukagun gizarte-ereduaren oinarri den aldetik, eta, era berean, lehen sektoreko eta landa- eta itsasertz-inguruneko pertsonek eredu horren barruan duten zeregina baloratzea. Beste era batera esanda, ideia hau litzateke: landa-eremutik hiri-eremura, balioa emanez eta landa-ingurunearen eta itsasertzaren garapen iraunkorra sustatuz, garapen ekonomiko eta sozial orekatuari egiten dion ekarpena onartzen duena.
Tokiko produktuaren enbaxadore saria
Bestalde,azken urte hauetan bezala, Donostiako Zinemaldiko ekitaldi berri honetan, beste sari bat emango zaio Euskadiko tokiko produktuen enbaxadore bati. Eusko Jaurlaritzak bultzatutako sari honen zortzigarren edizioa izango da. Sari horrek zinemako profesionalen lana aintzatesten du, eta, aldi berean, Euskadiko tokiko eta kalitatezko produktua eta gastronomia sustatu eta balioetsi nahi ditu.
Saria Eusko Label markaren eta Basque Wine sustapen-markaren babespean dauden Euskadiko elikagaien eta edarien sorta bat izango da, Arabako Errioxako, Euskal Sagardoaren, Txakolinaren eta Euskadiko artisau-garagardoaren ardoak hartzen dituena.
Gainera, eta Euskadiko jaki eta edariek Zinemaldian presentzia eta errekonozimendu handiagoa izan dezaten, Donostiako Zinemaldiko koktel ofizialetan produktuen presentzia indartu da. Egunero emango dira hurbileko produktuak, Eusko Label kalitate-markaren babespean dauden elikagaiak, eta edarietan, aldiz, Getariako Txakolina eta Arabako Errioxako Ardoa egongo dira.