Menua
Euskal Baserriko Eusko Labela duten Oilaskoak haragia ekoiztera bideratutako hegaztiak dira. Jatorriz lumaje gorria eta hanka horiak dituzte eta haien hautapen genealogikorako kontuan hartzen diren irizpideak dira hazkuntza geldoa, baserri-giroan bizitzea eta animaliak aire librera egokitzea.
Elikadura naturala dute, zerealetan oinarrituta, jaten dutenaren %60tik gora artoa baita. Hiltzerakoan 81 egun izan behar ditu gutxienez, eta haren ekoizpen-sistema tradizionala da. Horrek guztiak haragi osasuntsu, samur eta zaporetsua bermatzen dio kontsumitzaileari, merkatuan aurkitu ohi dugunaz haragokoa.
Horrela identifikatzen da
Euskal Baserriko Oilaskoa osorik eta zatietan saltzen da, eta Eusko Labelaren zigiluarekin eta kontrol-zenbaki batekin identifikatuta egongo da beti. Gainera, merkatuan badira “Eusko Labela duen Euskal Baserriko Oilaskoarekin eginda” oharra duten produktuak, hala nola hanburgesak edo izter beteak.
