Eusko Label film laburren lehiaketaren hirugarren edizioa abian da. Donostiako Zinemaldiak eta Eusko Jaurlaritzako Elikadura, Landa Garapen, Nekazaritza eta Arrantza Sailak bultzatuta, HAZIren bidez, ekimen honen helburua da Euskal Autonomia Erkidegoko hurbileko produktua zinemaren bidez zabaltzea, bai eta gure nekazaritza, abeltzaintza eta arrantza munduaren jasangarritasunari buruzko guztia sustatzea eta ezagutaraztea ere.
Film laburrak inskribatzeko epea abuztuaren 17ra arte egongo da zabalik Zinemaldiaren webgunean.Lanek gehienez hiru minutu iraungo dute, eta telefono mugikorraz eginda egongo dira. Filmen gaia Eusko Label sailaren xedeekin lotuta egon beharko da; izan ere, Euskadiko landa-inguruneak, kostaldeak eta lehen sektoreak hiri-gizarteari egiten dion ekarpenari buruzko mezu positiboak zabaltzeko asmoa du.
Zinemaldiaren Hautespen Batzordeak sei film labur aukeratuko ditu aurkeztutako guztien artean, eta adituz osatutako epaimahai batek erabakiko ditu Eusko Label bi sarien irabazleak. Lehenak 6.000 euro eskuratuko ditu eta bigarrenak, 4.000 euro. Bi film garaileak Zinemaldian emango dira, eta sariak amaierako galan banatuko zaizkie.
Lehiaketaz kanpo
Lehiazko sei lanez gain, aurten ere Eusko Label sailak Donostia Zinemaldiak ekoitzitako film laburrak izango ditu, Elikadura, Landa Garapen, Nekazaritza eta Arrantza Sailak transmititu nahi dituen balioak sustatzeko euskal esparruko hainbat zinemagileri aginduko dizkienak. Zinemaldia film labur horien eskubideen jabe izango da, eta Estatuan eta nazioartean zabalduko ditu, Eusko Label ekimena Euskaditik kanpo ere jakinarazteko.
